पोखरा, १४ असोज । उच्च अदालत पोखराले गण्डकी प्रज्ञा प्रतिष्ठानका कुलपति लगायतका पदाधिकारी नियुक्तिसम्बन्धी निर्णयको सक्कल कागजात पेस गर्न प्रदेश सरकारका नाममा वुधवार आदेश जारी गरेको छ।
उमेश सिकेले मुख्यमन्त्री तथा मन्त्रिपरिषद्को कार्यालय, गण्डकी प्रदेश समेतलाई विपक्षी बनाई दायर गरेको उत्प्रेषणयुक्त परमादेश रिटमाथि प्रारम्भिक सुनुवाइ गर्दै अदालतले यस्तो आदेश जारी गरेको हाे ।
उच्च अदालत पोखराका न्यायाधीशद्वय तेज नारायण सिंह राई र कृष्णराम कोइरालाको संयुक्त इजलासले गण्डकी प्रज्ञा प्रतिष्ठानका कुलपति लगायतका पदाधिकारी नियुक्तिका लागि सिफारिस समितिबाट मिति २०८३/०३/११ मा भएको निर्णय र सोही सिफारिसका आधारमा गण्डकी प्रदेश, मुख्यमन्त्री तथा मन्त्रिपरिषद्को कार्यालयबाट मिति २०८३/०३/२२ मा भएको निर्णयको सक्कल फाइल नै विपक्षी कार्यालयबाट पेसीको दिन पेस गर्न लगाउने आदेश दिएको हाे ।
साथै, उक्त फाइल प्राप्त भएपछि मुद्दालाई नियमानुसार पेस गर्नसमेत आदेशमा उल्लेख छ।
